Eie-tyd en Jou Welvaart

Toe ek hierdie artikel oor eie-tyd en ALLEEN wees begin skryf, het ek op die internet gesoek na 'n mooi aanhaling of gediggie om hier te plaas, maar al wat ek op afgekom het was dinge soos, "Om alleen te wees is om sonder liefde te wees", "Nou is ek alleen, die pad lyk donker, eensaam en dood" en "dit is swaar om alleen te wees". Nêrens is daar iets goeds of positiefs te vinde oor 'alleen' wees nie. Selfs Wikipedia beskryf iemand wat daarvan hou om alleen te wees as "iemand wat menslike wisselwerking vermy, uiterste vorme van skuheid en ingekeerdheid openbaar of aan sielsiektes ly." Hoe op aarde het die mensdom tot hierdie gevolgtrekkings gekom...? 

Ek verstaan heeltemal die gevoel van verlies wanneer mens 'n geliefde verloor of 'n verhouding tot 'n einde kom, maar selfs dít is nie 'n rede om alleen-wees te vrees nie. Om bang te wees om alleen te wees is soos om te sê, 'iewers langs my lewenspad het ek my eiewaarde verloor. Ek het myself nie lief genoeg om my eie geselskap te waardeer nie'. 

Nou het ek heeltemal van die paadjie af gedwaal! Nee, ek wou skryf oor die salige gevoel van alleen wees met jouself en dit geniet, daardie eie-tyd waarna soveel mense smag maar nie weet hoe om te bewerkstellig nie. Hulle voel skuldig as hulle bietjie tyd aan hulself spandeer met die gevolg dat elke oomblik gevul word deur ander mense se behoeftes te vervul en sodoende leer hulle nooit om alleen-wees te geniet nie. 

As kinders is ek en my susters en broer baie aangemoedig om alleen te speel, ons eie ding te doen en om ons eie geselskap te geniet. Dit het ons geleer om kreatief te wees, meer te dink aan oplossings vir probleme, selfstandige besluite te neem en om te verstaan wanneer ander mense alleen wil wees. 

Daardie eie-tyd gun mens die kans om die lewe in die regte perspektief te sien, dankbaarheid te beoefen en toe te laat dat oorvloed jou lewe betree sodat, selfs wanneer jy alleen is, jy nie eensaam sal wees nie. 

:: 

Ons geestelike Lente

 💚🤍 Lente is net om die draai — Terwyl jy die kaste skoonmaak en onder die meubels vee, dink aan dit: Lente-skoonmaak, terwyl dit die moeite werd is, sal net vir 'n seisoen duur, maar geestelike reiniging kan 'n ewige invloed hê. So moenie net afstof agter daardie boekrak nie. Maak ook jou hart skoon om geestelik gesond te word. 

Geestelike reiniging vereis diep skoonmaak — dit is huishouding wat verder gaan as wat ander sien en hoor. Dit is 'n reiniging van binne en buite. 

Soos jou hart skoon word, moet jou taal volg. Ek praat nie net van slegte taal nie, maar ook van die taal in jou kop — negatiewe praat en pessimistiese gedagtes. Dit sluit in die uitdaging om op te hou kla. 

Sommige van ons neem die lewe te ernstig op, of ons neem onsself te ernstig op. Jy moet jouself geniet en leer om pret te hê. Open jou hart vir vergifnis, raak ontslae van woede, wees vriendelik en medelydend en jy sal nie nodig hê vir 'n jaarlikse geestelike reiniging nie.

Hoe bly 'n mens vreugdevol?

As ons soms na onsself of na ander mense luister, is dit opvallend dat een saak vlak in die harte van baie mense lê: die behoefte aan vreugde! Vreugde is nie net 'n emosie nie. Dis 'n geestestoestand wat ons gereeld aan moet werk om aan die lewe te bly.

Hedendaags is dit so maklik om negatief te wees - die tydskrifte, die koerante, die internet - is almal vol van chaos en pyn en negatiewe verslae van moord en doodslag.

'n Vreugdevolle lewe is iets wat jy vir jouself skep deur elke dag dankbaar te wees vir dit wat jy het. Vreugde is 'n geskenk wat jy aan jouself gee deur jou fokus van jou eie pyn en probleme te verskuif na iets anders en dit maak geleenthede oop om die wêreld positief te beïnvloed.

Onthou, dit waaraan jy gereeld dink, word werklikheid. Een manier om vreugdevol te bly is om te aanvaar dat dinge nooit perfek gaan wees nie. Ons dink alles moet eers perfek wees voor ons waarlik kan leef. Nou ja, dinge gaan nooit 100% perfek wees nie. Om tevrede te wees te midde van jou omstandighede is ’n goddelike ding. Om vergenoegd te leef vra dankbaarheid. Raak vandag bewus van al die seëninge in jou lewe.

En moenie dat seer jou vreugde steel nie. Daar's 'n tyd en 'n plek vir alles - daar's 'n tyd om seer te voel en dit dan te oorleef. Daar's 'n tyd om te lag, en selfs net te glimlag, en die oomblik se vreugde diep te voel sodat dit telkens uit jou onderbewustheid opgegrawe kan word om weer te onthou.

So waak teen daai "klein jakkalsies" wat weer en weer probeer om jou vreugdes te steel. Kyk na binne om te sien of daar enige nare klein vreugdediewe rondsluip en sodra jy hulle geïdentifiseer het - dáárdie vriendin wat gereeld kla - verwyder dit uit jou lewe.

Dit kom neer op wat jy kies om te doen. Dis uiteindelik jou keuse of jy vreugde ervaar of nie.

Die kuns van toelating (of inlating)

Wanneer jy ontdek hoe om vibrasionele eenheid met Bron en jou begeertes te behaal, dan is jy in 'n vibrasionele stemming vir die toelating van dít wat jy begeer. En dis nie iets moeiliks om te doen as jy verstaan hoe jou Emosionele Stelsel werk nie.

Jou Emosies is Jou Leidingstelsel           

Jou emosies vertel jou alles wat jy nodig het om te weet omtrent jou gemoedstoestand van toelaat of nie toelaat nie. Met ander woorde, wanneer jy positief voel, bedoel dit dat jy in vibrasionele harmonie is met Bron en dat jy die goeie dinge toelaat om na jou te kom. Dis hoe eenvoudig dit is.

Wanneer jy goed voel, is jy in die Plek van Toelating. Wanneer jy positiewe emosies voel soos vreugde of dankbaarheid of liefde -- daardie emosies wat jou hart laat sing -- dan is jy in die Plek van Toelating. Toelating van wat? Toelating van Bron Energie, 'n koppeling met wie jy is. Toelating van welwillendheid. Toelating van duidelikheid en Toelating van oorvloed.

Wanneer jy negatiewe emosies voel soos woede, angs, frustrasie of depressie, dan is jy nie in 'n gemoedstoestand van Toelating nie. Dan is jy in 'n gemoedstoestand van weerstand waar jy, om een of ander rede, fokus  op maniere wat Suiwer, Positiewe Energie en Bron Energie nie Toelaat nie.

DIE PRAG VAN ONSEKERHEID

Dit het my 'n hele ruk geneem om uit te werk dat onsekerheid nie noodwendig 'n slegte plek is om te wees nie. Ek het ook begin besef dat, sodra ek "weet", meesal word my wete asof in klip gebeitel, en die gevolg is onbuigsaamheid wat die hele konsep van daadwerklike skepping teenwerk.

Die ander dag het ek op hierdie aanhaling van Deepak Chopra, in "The Seven Spiritual Laws of Success", afgekom, wat alles opgesom het omtrent wat ek oor onsekerheid ontdek het :

"Onsekerheid ... is die vrugbare grond vir pure kreatiwiteit en vryheid. Onsekerheid bedoel jy betree die onbekende in elke oomblik van ons bestaan. The onbekende is die gebied van alle moontlikhede, altyd vars, altyd nuut, altyd oop vir die skepping van nuwe manifestasies. Sonder onsekerheid en die onbekende is die lewe maar net 'n muwwe herhaling van afgesaagde herhinneringe. Jy word 'n slagoffer van die verlede en jou martelaar is jyself, oorgedra van gister."

Deesdae, as ek tot aangesig kom met 'n vurk in die pad en nie seker is watter kant toe nie, neem ek my toevlug tot onsekerheid. Ek hoef dan nie in die hier en nou alles uit te werk nie.

En in daardie gemoedstoestand vind ek myself in die vloei van Toelating.

.