Neem 'n besluit

Goeie dag vanaf Oorvloed!

Vandag wil ek praat oor 'n paar besluite wat ons moet neem om ons lewe op dreef te kry - dis so maklik om die klein dingetjies wat pla sommer maar net so te los vir môre of 'een of ander tyd', en my pa het altyd gesê  "moenie afstel vir môre wat jy vandag kan doen nie".

Neem 'n besluit om ...

... NOOIT OP TE GEE NIE

Elke dag moet jy ’n keuse maak: gaan ek ’n oorwinnaar of ’n slagoffer wees? Om probleme te bowe te kom begin dus by ’n keuse! Ek moet die besluit neem dat ek wíl wen en gaan volhard om my doel te bereik – ongeag wat my omstandighede mag wees.

... ALLEEN DIE MAS OP TE KOM

Bevind jy jouself in ’n situasie waar jy alleen voel en nie weet hoe om die eise te hanteer nie? Jy moet verstaan dat niemand jou gaan red nie, en dat jy self beheer sal moet neem. Probeer om jou emosies te verstaan. Is dit eensaamheid, ’n strewe na perfektheid of dalk skuldgevoelens wat jou onderkry? Of is dit ’n konkrete probleem soos onvoldoende finansies, te min tyd of geen ondersteuning nie?

Sodra jy bepaal het wat die probleem is, moet jy jouself afvra hoe jy beheer hieroor kan neem. Probeer wyer kyk as net die voor-die-hand-liggende. Soms, as ons objektief na ’n situasie kyk, vind ons dat die oplossing reg voor ons oë is. Beplan stap-vir-stap hoe jy by ’n beter plek gaan uitkom en moenie moed opgee tot jy dit regkry nie.

Moet ook nie vergeet dat jy nooit alleen is nie – selfs in jou moeilikste tye is daar Iemand met oop arms, gereed om jou te vertroos en te dra.

... KRITIEK BETER TE HANTEER

Meeste van ons is skuldig daaraan dat ons ander mense se kritiek kop toe vat. Dit kan so erg raak dat jy al die positiewe uitsif en nét die negatiewe agterhou en daarop fokus. Dit word die maatstaf waarteen eiewaarde gemeet word.

Al is kritiek nooit lekker nie, is daar dinge wat jy kan doen om dit beter te hanteer:

•    Neem ’n wilsbesluit om nie onmiddelik op die kritiek te reageer nie. Tree terug sodat jy nugterder na die kritiek kan kyk.

•    Kritiek moet op gedrag, nie op ’n persoon nie, gemik wees. As iemand persoonlik raak, versoek ’n fokus op die gedrag wat onaanvaarbaar is.

•    Onthou dat ervaringe uit jou verlede ’n rol kan speel in hoe jy kritiek hanteer (byvoorbeeld die invloed van ’n baie kritiese ouer).

•    Skryf die kritiek neer en slaap eers daaroor.

•    Maak seker of die kritiek waar is en neem verantwoordelikheid vir dit waaroor jy beheer het. Vra iemand wat jou goed ken, se mening.

•    Sien dit as ’n geleentheid om te leer van jou eie “blindekolle” en kwesbaarhede en te groei in jou menswees.

... DAAI SLEGTE GEWOONTES AF TE SKUD

Elkeen van ons het een of ander slegte gewoonte – te veel eet, rook, wat ook al – wat ons wil afskud. Onthou net, gewoontes vorm gewoonlik geleidelik, daarom sal dit tyd neem (drie tot ses weke) om te verander, maar dit is moontlik deur hierdie stappe te volg: Maak ’n keuse om dit te wíl doen. 

* Verander jou “binnepraat”, want solank jy dieselfde goed vir jouself sê, sal jy outomaties dieselfde goed doen. 

* Visualiseer hoe jy dit regkry om die nuwe gedrag uit te leef. Hoe duideliker jy dit kan visualiseer, hoe groter is die kans dat jy sal volhou. 

* Gee vir jouself erkenning elke keer wat jy suksesvol die ou gewoonte oorkom. 

* Dit help baie indien iemand anders weet wat jy probeer bereik en as ’n ondersteuningstelsel kan optree. 

* Sit ’n prentjie, aanhaling of grafiek êrens op waar jy dit elke dag kan sien om jou te herinner aan dit wat jy wil bereik. Dit moet die positiewe nuwe gedrag of gewoonte voorstel.

Onthou, jy kan die ou gewoonte verander as jy dink jy kan!

... ’N KLA-KOUS OP SY OF HAAR PLEK TE SIT

Die beste manier om van ’n kla-kous ontslae te raak, is om te begin kla voordat sy die kans kry. Kan jy jou haar skok indink as jy wegtrek met: “Ja jong, die land is besig om in die afgrond te versink. Een van die dae gaan ons soos Zimbabwe opeindig. Die petrolpryse is verskriklik, die voedselpryse is angswekkend ... Ons gaan dit nie maak nie, veral nie met al die klakouse rondom ons nie”.

Ek is seker die persoon sal vir ’n oomblik heeltemal vergeet wat rondom haar aangaan. Jou laaste stelling behoort haar skok in saamstem te verander, en dit behoort haar tot nadenke te bring.

Die waarheid is dat almal maar ’n geneigdheid het om so nou en dan te kla. Dis geoorloof as jy die volgende reël toepas: Jy mag net drie keer oor dieselfde ding kla. Doen dan iets om die situasie te verander, of besef dat jy niks daaraan kan doen nie en kom oor dit (met ander woorde, hou op kla daaroor!) Wat help dit in elk geval?

... JOU DROOM TE BEWAARHEID

Moenie dat jou drome wensdenkery bly nie – ontwikkel ’n duidelike prentjie daarvan. As jy nie weet wat jou droom is nie, sal jy mos nooit daarby uitkom nie. Skryf jou droom neer en sien in jou gedagtes hoe dit stapsgewys ’n realiteit word.

Gaan oor tot aksie, anders sal jou droom doodgebore wees. Iemand het eenmaal gesê die beste manier om jou drome waar te maak is om wakker te word! Min mense het die moed of wil om daardie warm plekkie te verlaat en moue op te rol om te begin werk. Dit gaan beplanning (’n vaste doelwit het ’n spertyd), innerlike motivering en toewyding kos. Maar hou jou oog op die einddoel.

Jy moet uit die staanspoor weet dat daar terugslae gaan wees op pad na die vervulling van jou droom. Glo in jouself en weet dat jy tot alles in staat is deur Christus wat jou krag gee.

... VREDE TE MAAK MET DIE OUDERDOM

Dit voel soos gister toe jy 20 was! Maar die liggaam wat protesteer as jy trappe klim, die wilde grys haar wat uit die niet verskyn en die fyn lagplooitjies om jou oë verklap dat jy definitief nie meer 20 is nie.

Vrede met jou ouderdom begin by die vrede wat jy ervaar oor die lewe wat jy tot dusver gelei het en die hoop en drome wat jy vir die toekoms het; die vermoë om in die “nou” te leef en elke oomblik te koester. Jou verantwoordelikheid is om die beste “jy” te wees gegewe dit wat jy ontvang het. Deur na jou liggaam te kyk en reg te eet, genoeg te slaap, te oefen en te ontspan en dikwels met oorgawe te lag, kan jy van binne straal – en dít oorskadu gewoonlik meeste tekens van die ouderdom.

... TE SÊ HOE JY VOEL SONDER OM SEER TE MAAK

Vra jouself hoekom jy seergemaak voel. Dalk het dit nie te doen met dit wat die ander persoon gesê of gedoen het nie, maar met ’n seer uit die verlede waarmee jy nie gedeel het nie.

Solank jy bly by hoe jý voel sonder om die ander persoon te beskuldig, is jy op die regte pad. Vermy uitdrukkings soos “Jy het my gevoelens seergemaak” of  “Jy het my beledig toe jy gesê het ...” Sê eerder: “ Ek het seergemaak gevoel toe jy ...” of “Ek het beledig gevoel toe jy ....” Dit neem onmiddellik die fokus weg van die ander persoon en plaas jou gevoelens op die tafel.

Onthou, ander maak ons nie seer nie; ons kíés om seergemaak te voel.

Soms sê en doen mense dinge uit onkunde. Vind eers kalm uit wat die persoon se bedoeling was, haal diep asem en verduidelik dan presies hoe jy oor dinge voel.

 

... NIE OOR ALLES TE STRES NIE

Vir baie vroue het kommer ’n leefwyse geword. Selfs klein dingetjies veroorsaak dat hulle angstig en gespanne raak. Hulle vra heeltyd die vraag: “Wat as ...”

Die realiteit is dat daar dinge in die lewe is waaroor ons geen beheer het nie. Dit maak nie ’n verskil hoeveel jy daaroor stres nie – dit gaan in elk geval gebeur! Deur chronies bekommerd te wees oor jou man en kinders beperk jy uiteindelik jou eie vermoë om jou emosies te hanteer.

Die hartseer is dat ons onsself moeg maak deur bekommerd te wees oor dinge wat meestal nooit gebeur nie. Ons mors al ons emosionele energie daarop.

Sit terug, haal diep asem, aanvaar die feit dat dinge soms verkeerd loop, hanteer dit soos dit kom en probeer om nie al jou tyd en energie te vermors op bekommernisse waaraan jy in elk geval niks kan doen nie.

... DIE TRAUMA VAN GEWELD TE HANTEER EN TE OORKOM

Jou eerste gewaarwording is verlies. Iemand het jou persoonlike spasie binnegedring, jou lewe bedreig en jou besittings geneem. Die skok het ook ’n groot impak op die chemiese balans in jou brein en kan die funksionering daarvan nadelig beïnvloed.

Dit is belangrik om nie in ’n negatiewe spiraal vasgevang te word nie. Probeer om nie die groter prentjie mis te kyk nie. Kies om doelbewus te soek na positiewe dinge. Waak daarteen om nie jouself te isoleer nie. Omring jou met mense wat realisties positief is en daar is vir jou. Gee jouself kans om deur die trauma te werk. Moet dit nie onderdruk en aangaan asof niks gebeur het nie, anders gaan jy later, met baie meer moeite, jou emosies moet hanteer.

Dit kan ook help om met ’n professionele persoon te praat of joernaal te hou van jou emosies.

Kom ons neem daardie besluite VANDAG en mag ons reistog genotvol wees!

Groete,

MAREE

Die Wet van Aantrekkingskrag - 'n Nuwe uitkyk op 'n ou konsep

Waaraan dink jy op hierdie oomblik, reg nou? Die Wet van Aantrekkingskrag verklaar dat "waaroor ons dink, dit bring ons tot stand''. Vir baie mense kan hierdie stelling klink na nuwerwetse fluff maar glo dit of nie, dit is gebou op 'n soliede wetenskaplike basis.

Hedendaagse top kwantum fisici het ontdek dat die heelal en ons realiteit baie beslis gekonnekteer is met die ''waarnemer''.

Met die studie van kwantum gedeeltes (die kleinste waarneembare dele van materie) het hierdie wetenskaplikes ontdek dat die materie beweeg het in ooreenstemming met die persoon wat die eksperiment uitgevoer het. En as die wetenskaplikes verklaar dat kwantum stukkies hulself op 'n sekere manier gedra, dan doen hulle dit. Dit is die ''waarnemer'' wat die reaksie veroorsaak!

Wat bedoel dit vir ons normale mense? Wel, eintlik het hierdie wetenskaplike studies verreikende nagevolge vir ons aangesien ons wêreld uit hierdie selfde kwantum gedeeltes bestaan! In hierdie geval is ons die ''waarnemers'' en derhalwe die skeppers van ons eie realiteit, ons wêreld en ons ondervinding. 

So, wees versigtig waaraan jy dink! Byvoorbeeld, begin jou gedagtes ooit met die volgende?

Ek verstaan nie ...

Ek wil nie hê nie ...

Ek is gefrustreerd omdat ...

Ek haat my ...

Ek kannie besluit nie ...

Ek is gestres oor ...

Ek is bekommerd dat ...

Ek behoort te kan - maar ek kannie ...

Hoekom het ek soveel probleme?

Die Wet van Aantrekkingskrag is onverskillig en onpartydig oor die woorde wat eerste in jou gedagtes opkom - waaroor jy ookal dink, sal jy aantrek in jou lewe, want jy besluit hoe die kwantum gedeeltes gaan optree.

Wanneer jy dink ''Hoekom gebeur slegte dinge altyd met my?'' dan trek jy slegte gebeure aan.

Wanneer jy dink ''Ek wil uit die skuld uit'', trek jy meer skuld aan.

Wanneer jy dink ''Ek is bekommerd ek gaan siek word'' trek jy siekte na jou lewe aan.

Die Wet van Aantrekkingskrag bring na jou wat ookal jy op fokus, al is dit nie wat jy wil hê nie. Verstaan jy?

As jy hierdie prinsiep verstaan, hier is 'n paar voorbeelde hoe om Die Wet van Aantrekkingskrag vir jou te laat werk in plaas van teen jou. Neem kennis van jou gedagtes en verander jou denke as volg :

''Ek wil uit die skuld uit'' na ''Ek verdien uiterste rykdom!''

''Ek haat my baas'' na ''Ek sien vooruit daarna om my eie besigheid te hê'' of ''om my droom pos te vind.''

''Ek verstaan nie hoekom hy so lui is nie'' na ''Ek lief dit wanneer hy my in die huis help.''

''Ek is gestres deur hierdie projek'' na ''Ek ondervind altyd interessante resultate in my projekte.''

"Ek is bekommerd ek word siek'' na ''Ek ondervind wonderlike gesondheid elke dag.''

Noudat ons Die Wet van Aantrekkingskrag 'n bietjie beter verstaan, is dit glad nie verbasend hoekom soveel mense sukkel met geld nie. Die gesegde ''die rykes word ryker en die armes armer'' bewys net hoe Die Wet van Aantrekkingskrag regtig werk.

Omdat ryk mense geld het, dink hulle dikwels aan die beste manier hoe om hulle geld te gebruik, derhalwe trek hulle nog meer geld aan. Aan die ander kant dink die armes aan hoe min geld hulle het en derhalwe trek hulle nog meer gebrek aan.

Huidiglik word 96% van die wêreld se rykdom deur 1% van die populasie verdien. Dit is nie toevallig nie.

  

In die woorde van Wallace D. Wattles,

"Die eienskap van geld en eiendom kom as 'n direkte resultaat

van as jy dinge 'op 'n sekere manier' doen. Diegene wat nie dinge

'op 'n sekere manier' doen nie, maak nie saak hoe hard hulle werk

nie, sal arm bly. Dit is 'n natuurlike wet van 'soort soek soort'."

- Maree

Laat gaan

Die begin van die jaar is altyd tyd vir 'spring cleaning' (alhoewel baie van ons dit al verlede September gedoen het!) - nie net die motorhuis of stoorkamer nie, maar ook ons innerlike stoorkamer waar ons alles opstoor van onvergifnis, haat en woede tot leed en negatiewe oortuigings. Ons moet leer om te laat gaan en ontslae te raak van al die dinge wat ons terughou van die mildelike OORVLOED in die Heelal. 

Laat Gaan
Laat gaan is nie om op te hou omgee nie—dit bedoel net ek kan dit nie doen vir iemand anders nie
Laat gaan is nie om jouself af te sny nie—dit is die realisasie dat ek nie andere kan beheer nie
Laat gaan is nie om nie te doen nie—maar om te leer van natuurlike gevolge
Laat gaan is nie om op te gee nie—dit bedoel die uitkoms is in my hande
Laat gaan is nie om 'n ander te blameer nie—dit is om die meeste van myself te maak
Laat gaan is nie om reg te maak nie—dit is om te ondersteun
Laat gaan is nie om te veroordeel nie—maar om mense toe te laat om te wees wie hulle wil
Laat gaan is nie om in die middel te wees en die uitkoms te beheer nie—maar om andere toe te laat om in beheer te wees van hulle eie noodlot
Laat gaan is nie om te beskerm nie—dit is om iemand anders toe te laat om realiteit te aanvaar
Laat gaan is nie om te ontken nie—maar om te aanvaar
Laat gaan is nie om te 'nag' en te argumenteer nie—dit is om my eie tekortkominge te ondersoek en reg te maak
Laat gaan is nie om te kritiseer en almal te beheer nie—maar om dít te word waaroor ek droom
Laat gaan is nie om berouvol oor die verlede te wees nie—maar om te groei en te lewe vir die toekoms

Laat gaan is om minder te vrees en meer te lewe!

Jy is waar jy is vandag oor wat jy aanhoudend doen. Meeste mense klassifiseer nie die "klein dingetjies" as slegte gewoontes nie - soos om elke oggend 'n bietjie laat by die werk op te daag, of om al jou klere te laat rondlê vir iemand anders om te tel, of om altyd te kla en argumenteer oor alles - maar dit sê beslis iets omtrent jouself.

Werk daaraan om hierdie klein 'gewoontes' te verander wat jou terughou - maak alles waarmee jy besig is vandag klaar, moenie dit los vir iemand anders om te doen nie.

Maak 'n lys van dit wat jy weet jy gereeld doen wat jy nie moet nie - en begin hierdie gewoontes te verander in goeie gewoontes.

Niemand kan keer waarheen jy jou gedagtes lei nie. Daar is geen einde aan die vreugdevolle reise wat jy kan ondervind nie. Op die paadjie na jou geluk sal jy alles wat jy wil doen, wees of verlang, ontvang.

(Deur ander hul eie reistog toe te laat, laat jy joune toe!)

.

Iets vir Vrydag

Ons keuses is nie reg of verkeerd nie, dis net 'n keuse. Maar alle keuses lei tot 'n gevolg en dié gevolg bepaal hoe jy jou lewe lei. Ek weet nie of daar 'n volgende leeftyd is om weer te probeer nie, maar wat ek wél weet is dat, in die aangesig van die onsekerheid daarvan, maak dit sin om nou, in hierdie leeftyd, hierdie oomblik, jou lewe te lei vol passie en met oorgawe, en om dít te doen waarvoor jy lief is.

Kom ons begin die nuwe jaar op 'n passievolle manier, vol hoop en verwagting vir alles wat nog voor ons uitgestrek lê.

Ek wil léwe... 31 Desember 2019

Geniet die lewe, gryp die dag aan! Hoe voel jy vandag? Wat is jou gemoedstoestand? Hoeveel geniet jy die lewe? Weet jy dat NOG 'n jaar nou alweer verby is?

Ek het hierdie oulike ding gelees oor bekommernis:

"Sluit die hekke van die verlede. Moenie aanhou terugkyk na die probleme en foute van die verlede nie. Sluit ook die hekke van die toekoms. Moenie bekommerd wees of vrees vir wat in die toekoms kan gebeur nie. Die toekoms is vandag. Hanteer vandag. Jy kan nie in die verlede leef nie, ook nie in die toekoms nie. Jy kan net vandag leef. Elke dag is 'n nuwe lewe, 'n nuwe begin. Berei jouself voor vir die toekoms deur vandag tot sy volle potensiaal te leef. As jy bekommerd is oor wat dalk more mag verkeerd gaan, was jy verniet bekommerd. En as dit dan wel gebeur, was jy twee keer bekommerd.”

.

Kry weer gesag oor jou kinders

Dis September en vakansietyd en die einde van die jaar lê voor. Met 'n besige jaar agter die rug, kan dit voel jy asof jy gesag oor jou kinders verloor het en dit nie kan terugkry nie. Dis nie te laat nie – jy kan jou gesag herwin en jou kinders op 'n gesonde manier dissiplineer.

Gesonde gesag bestaan uit verskeie boustene:

Onvoorwaardelike liefde

'n Belangrike vraag om te vra: “Hoe kan ek my kind beter liefhê?” Dit moet ons eerste doel wees. Ons moet glo in die krag van liefde om nie net ’n kind daarmee te kan toevou nie maar om werklik ’n kind daarmee te kan vorm. Ons moet liefde ook nooit as ’n teenpool van dissipline of gesag sien nie.

Eer (respek)

Dis ons reg om te verwag dat ons kinders ons met respek behandel, ordentlik met ons praat en op ons oudag sekere verantwoordelikhede teenoor ons nakom. Maar dit beteken ook dat ons ook ordentlik met ons kinders moet praat en hulle met die nodige respek moet behandel.

Hou by dit wat jy gesê het

Ons het die reg om aksie te verwag wanneer ons praat. Hierdie reg word weggegooi wanneer ons drie en vier maal praat, al harder praat en bang is om te praat as ons weet ons kind gaan sleg op ons woorde reageer. As ’n kind egter leer dat ons net een keer kalm en ordentlik praat en dan optree, geniet ons die voordeel van ware seggenskap.

Aanspreeklikheid

Een sinoniem vir aanspreeklikheid is verantwoordelikheid, en albei woorde verklap waaroor hierdie aspek van gesag handel. Neem aanspreeklikheid vir jou kinders se gedrag en besef ons leer mense hoe om ons te behandel.

Die reg om grense vas te stel

Ouers verwaarloos hierdie aspek van gesag wanneer hulle net op kinders se stoutigheid en ongehoorsaamheid reageer. Ons leer nie ons kinders vooraf waar die grense is nie en wanneer hulle dan in ons oë die grense oorsteek, straf ons hulle. Dis nogal onregverdig, nie waar nie? Ons weet tog die meeste kinders word nie met ’n goed ontwikkelde aanvoeling vir grense gebore nie!

Die vermoë om vreugde en sekuriteit te gee

Ons as ouers het die mag om ons gesin veilig te laat voel en ons huise met vreugde te vul. Die gesin ’n kind se hawe. Wanneer die kind tuis gelukkig en geborge voel, word dit soveel makliker om die ouers se gesag te aanvaar.

Erkenning van die bevelsorde

As ons teen die regering uitvaar, of as ons die sondes uit ons dominee se verlede met smaak oorvertel, doen ons verkeerd. Ons leer ons kinders om gesagsfigure net te respekteer wanneer hulle doen waarvan ons hou. Voor ons weet, spoel die minagting vir gesag ook in ons eie huis in, en met al ons kritiek teen ander, sal ons self nie kritiek vryspring wanneer ons nie na ons kinders se pype dans nie.

Regspraak en regverdigheid

Hou op om van alles ’n grys area te maak deur nie vir jou kinders reg en verkeerd te leer onderskei nie. ’n Gewete ontwikkel met tyd en deurdat ons geleer word wat aanvaarbaar en onaanvaarbaar is. Dis onnodig om in sewe sinne aan ’n kleuter te verduidelik waarom ’n mens nie jou pa mag spoeg of jou ma se hare mag trek nie. Dis verkeerd. Eenvoudig.

Invloed en inspirasie

Ouers het ongelooflik baie mag om hulle kinders se lewens vir altyd te beïnvloed – baie meer as wat ons besef. Die positiewe invloed is onskatbaar en dit is die deel van ons universiele “mag” wat ons moet leer uitbou as ons die soort gesag wil hê wat ons wil verdien. Intussen moet ons die vermoë om dit vernietigend teen ons kinders te gebruik in onsself raaksien en beveg.

Nederigheid

Wat ouerskap betref, is nederigheid  ’n voorwaarde vir gesag. Ons kinders is eerste daar om te sien wanneer ons fouteer! Hulle het dus ook die reg om eerste te hoor dat ons jammer is.

 

.


 

Maak vere die voël?

Hoeveel maal het jy al gevoel dat mense jou nie sien soos jy werklik ís nie? Ons almal weet jy word na jou klere en voorkoms geoordeel en dieselfde gaan vir hoe jy jouself gedra en ook vir wat jy sê, en hoe jy dit sê. 

Maar ons ken ook almal die Engelse gesegde, “Don’t judge a book by its cover”, en ons almal weet hoe waar dít is. Hoeveel maal al het ek ‘n boek gekoop omdat die voorblad so pragtig was, net om uit te vind dit dit die grootste lees-snert is wat ek al ooit teëgekom het. En ‘n boek met die aakligste voorblad het ek al oor en oor gelees. 

Jy is dus vry om jouself te gedra soos jy wil en ook te sê wat en hoe jy wil, maar onthou dat jy dan daarvolgens geoordeel sal word en baie wonderlike geleenthede sal misloop as gevolg van jou “lelike voorblad”, en dus dan nie moet kla dat niemand jou ‘verstaan’ nie. Maar indien iemand wel verder kyk as jou “lelike voorblad” en die ware jy ontdek, sal jy ‘n vriend of vriendin hê wat jou waarlik lief het vir jouself, vir wie jy werklik is. 

::

Die prag van Onsekerheid

::

Wanneer jy ontdek hoe om vibrasionele eenheid met Bron en jou begeertes te behaal, dan is jy in vibrasionele toestemming vir die toelating van dít wat jy begeer. En dis nie iets moeiliks om te doen as jy verstaan hoe jou Emosionele Stelsel werk nie. 

Jou Emosies is Jou Leidingstelsel. Jou emosies vertel jou alles wat jy nodig het om te weet omtrent jou gemoedstoestand van toelaat of nie toelaat nie. Met ander woorde, wanneer jy positief voel, bedoel dit dat jy in vibrasionele harmonie is met Bron en dat jy die goeie dinge toelaat om na jou te kom. Dis hoe eenvoudig dit is. 

Wanneer jy goed voel, is jy in die Plek van Toelating. Wanneer jy positiewe emosies voel soos vreugde of dankbaarheid of liefde -- daardie emosies wat jou hart laat sing -- dan is jy in die Plek van Toelating.

Toelating van wat? Toelating van Bron Energie, 'n koppeling met wie jy is. Toelating van welwillendheid. Toelating van duidelikheid en toelating van oorvloed. Wanneer jy negatiewe emosies voel soos woede, angs, frustrasie of depressie, dan is jy nie in 'n gemoedstoestand van Toelating nie. Dan is jy in 'n gemoedstoestand van weerstand waar jy, om een of ander rede, fokus op maniere wat Suiwer, Positiewe Energie en Bron Energie nie Toelaat nie. 

DIE PRAG VAN ONSEKERHEID 

Dit het my 'n hele ruk geneem om uit te werk dat onsekerheid nie noodwendig 'n slegte plek is om te wees nie. Ek het ook begin besef dat, sodra ek "weet", meesal word my wete asof in klip gebeitel, en die gevolg is onbuigsaamheid wat die hele konsep van daadwerklike skepping teenwerk. 

Die ander dag het ek op hierdie aanhaling van Deepak Chopra, in "The Seven Spiritual Laws of Success" afgekom, wat alles opgesom het omtrent wat ek oor onsekerheid ontdek het : 

"Onsekerheid ... is die vrugbare grond vir pure kreatiwiteit en vryheid. Onsekerheid bedoel jy betree die onbekende in elke oomblik van ons bestaan. The onbekende is die gebied van alle moontlikhede, altyd vars, altyd nuut, altyd oop vir die skepping van nuwe manifestasies. Sonder onsekerheid en die onbekende is die lewe maar net 'n muwwe herhaling van afgesaagde herhinneringe. Jy word 'n slagoffer van die verlede en jou martelaar is jyself, oorgedra van gister." 

Deesdae, as ek tot aangesig kom met 'n vurk in die pad en nie seker is watter kant toe nie, neem ek my toevlug tot onsekerheid. Ek hoef dan nie in die hier en nou alles uit te werk nie. 

En in daardie gemoedstoestand vind ek myself in die vloei van Toelating. 

::

'n Tyd om aan te vul

'n Week sonder kreatiwiteit - nee, langer as 'n week... en die snaakse ding is dat ek eintlik verbaas is dat ek nie skuldig voel daaroor nie. Met 'kreatiwiteit' bedoel ek skets en skilder. Gewoonlik voel ek ongemaklik, al asof iets kortkom, as ek vir 'n paar dae nie geskilder of geteken het nie. Hierdie keer is dit anders - 'n stilte het sommer net neer gedaal... 

Ek het vir die afgelope twee jaar elke dag van my lewe iets geskilder, al was dit net 'n klein sketsie in een van my skets-joernale. Dit was soos tande borsel en iets wat ek verskriklik geniet. Maar oor die afgelope paar weke het my gedagtes, en hande, in ander rigtings begin beweeg - bietjie aandag gegee aan my huis se dekor; die tuin, wat 'n hele winter verwaarloos was, begin opgeknap; klein instandhoudingstakies wat lank verwaarloos was, weer aangepak en van my te-doen-lysie afgeskraap.

Ek maak ook gebruik van hierdie 'stil' gevoel wat oor my gedaal het om weer my yoga te beoefen, ook iets wat in die slag gebly het die afgelope twee jaar. 'n Jaar of twee terug het ek gereeld elke oggend gemediteer en ek het onlangs besef hoe baie ek dit mis. So, vyf-uur in die oggend is my spesiale stil tyd, wanneer ek siel en liggaam bymekaar skraap en ontslae raak van enige lastige pla-gevoelens. 

'n Ander voorliefde van myne was om te skryf. Briewe te skryf. In my Joernale te skryf. Deurdat ek so baie tyd voor die rekenaar en op die internet deurbring, het hierdie genotjie my begin ontglip. Mens praat met al jou vriende en familie op FaceBook en op Skype, gesels met almal in hul blogs en stuur boodskappe met jou Smartfoon. Oor die afgelope paar weke het ek weer begin om briewe te skryf, meesal aan my klein kinders, en hulle dink seker hul ouma is van haar sinne beroof! Maar ek kannie vir jou sê watse heerlike genot dit is om weer 'n vulpen vas te hou en toe voel hoe dit oor die papier gly nie! 

Maar eintllik is al hierdie dinge ook maar 'n tipe van kreatiwiteit - enige iets wat die siel streel is gaaf met my! 

::

Daar is genoeg van Alles, vir Almal!

Baie van die besprekings oor aardverwarming gaan oor die feit dat die mens besig is om al die hulpbronne van ons Moeder Aarde uit te put. 

Ek wil graag hê dat mense moet besef dat hulle siening dat daar nie "genoeg" vir almal is nie, verkeerd is en nie gevalideer of geldig is nie. Julle konklusie dat daar nie genoeg van iets is nie—of dit nou grond is of geld of helderheid of hulpbronne is—jou gevoel dat daar nie genoeg van iets is nie, is afkomstig van die feit dat jy 'n vibrasie geleer het, sonder opset, wat jou apart hou van dit wat jy begeer. 

Jy impliseer dat daar nie genoeg in die emmer is nie, dat daar nie genoeg in die hoop is nie, dat daar nie genoeg in die Bron is nie—dat die Bron van waar jy alles moet kry 'n limiet het. En aangesien die Bron gelimiteer is, is dit al daardie boggers wat dit reg gekry het om alles vir hulle self te vat, se skuld dat daar niks oor is vir jou nie. 

En ek sê, o wee, julle kannie verder van die waarheid wees omtrent die oorvloed van die Bron nie! 

Daar is nie 'n tekort nie. As jy kan identifiseer wat jy begeer, dan herken Bron Energie jou begeerte en begin dit onmiddellik aan jou uit te lewer—en dit sal manifesteer in jou ondervinding, in die volheid, op 'n manier wat jy, en alleenlik jy, kan leer om dit toe te laat. 

En soos jy die dinge herken wat jy nie het nie, en hoe meer jy daarop fokus en sê, ek het nie dit of dat nie en dat ek regtig dit of dat wat ek nie het nie wil hê, en ek wil regtig hê wat ek NIE het nie, wil ek vir jou sê dat jy nie terselfdertyd kan FOKUS op iets wat jy nie het nie en dit dan na jou toe AANTREK nie, want in jou fokus op dit wat jy nie het nie, offer jy 'n vibrasie aan die Heelal wat sê, "Ek is die een wat dit nie het nie." 

Die Heelal is gebaseer op die wet van aantrekkingskrag, wat sê, "Die vibrasie wat jy uitstuur is die vibrasie wat jy ontvang." Jy kannie jou radio op 98.6 stel en dan verwag om 101 FM te ontvang nie—dit verstaan jy. Jy kan dus nie jou vibrasie stel op "ek het dit of dat nie" en dan in die plek wees om dit wat jy wil hê te ontvang nie, want die seine stem nie ooreen nie—en die wet van aantrekkingskrag reageer op die vibrasie van jou begeertes. Lekker, is dit nie? Lekker om te weet. So konstant—altyd konstant. 

Niemand affekteer jouself behalwe jy self nie. O ja, jy kan andere dop hou en opgewerk raak oor wat hulle doen. En dan voel die Heelal daardie vibrasie. Maar jou vibrasie is joune. Jy het beheer oor jou vibrasie. En wanneer jy leer om opsetlik 'n spesifieke vibrasie uit te stuur, dan is jy die opsetlike skepper van jou eie ondervinding. 

En voordat jy leer om opsetlik 'n vibrasie uit te stuur, is jy maar net 'n skepper van jou ondervinding—'n soort van skepper by verstek (default).

As jy die vermoë het om dit te begeer, het die Heelal die vermoë om dit te voorsien.

::

Massa-bewustheid en Ons Aarde

Baie min mense is bewus van die konsep van "massa-bewustheid" en hoe dit ons en ons moeder aarde affekteer. Ons geestestoestand en aksies word grootliks bepaal deur dit wat ons hoor en wat om ons aangaan. 'n Tipe van indoktrinasie wat plaasvind deur waaroor mense praat en wat daar in die media gesê word.

En hoe meer slegte nuus die media adverteer (ons kan hulle nie blameer daarvoor nie, dit is wat koerante en TV programme laat verkoop), hoe meer praat die mense daaroor, en hoe meer die mense daaroor praat, hoe meer spits ons onself toe op al die negatiewe punte wat uitgebasuin word oor moord en roof en aardverwarming en onheil.

Die ding is om nie onsself toe te laat om geaffekteer te word deur al die stories en voorspellings van onheil nie - ons weet mos dat, deur ons gedagtes toe te spits op die positiewe aspekte van die lewe, ons meer van dieselfde sal aantrek na ons toe.

OORVLOED en gesondheid vir ons Moeder Aarde kan in werking gestel word deur almal van ons; ons is almal mede-werkers en kan, deur die lewens wat ons lei, die gedagtes wat ons dink en die aksies wat ons neem, bydra tot die skepping van oorvloed. En dit moet 'n prioriteit vir ons almal wees.

En dis oujaarsdag wat amper verby is

Om afskeid te neem is altyd hartseer. Selfs om afskeid te neem van die ou jaar. Al was dit gevul met seerkry of dalk verlies, is my wens vir jou dat jy alles wat goed en mooi is uit die ou jaar kan saambondel en saamneem die nuwe jaar in. Mag die nuwe jaar vir julle almal die geleentheid gee om op te styg – waarmee julle ook al besig is!

Daar was reën vroeër op hierdie donker nag,
buite sis, vlieg en donder vuurpyle,
die kat spring by die oop venster in,
daar was reën vroeër op hierdie donker nag,

Buite sis, vlieg en donder vuurpyle
klappers maak doem, doem, ka-boem en ka-boem,
honde blaf van vrees, tjank histeries buite my kamer,
buite sis, vlieg en donder vuurpyle.

Klappers maak doem, doem, ka-boem en ka-boem
en dis oujaarsdag wat amper verby is

teen half twaalf vier die bure fees,
‘n nuwe boodskap word deur my selfoon vertoon
en dis oujaarsdag wat amper verby is,

as hulle jolig hard sing en dans
asof daar iets groots in die nuwe jaar is
en hulle nie ‘n oomblik langer kan wag nie,
as hulle jolig hard sing en dans

... en baie later word dit veel stiller...

-Uittreksel vanaf Gert Strydom

Prioriteite en keuses

Vandag wil ek praat oor die keuses wat ons almal in ons lewens maak.

Ek is mal oor ons Suid-Afrikaanse dierelewe en sal definitief in 'n volgende leeftyd sorg dat ek 'n loopbaan in daardie rigting kies. Intussen leef ek my liefde vir die dierelewe uit deur hulle te skilder!

Maar alles kom neer op prioriteite, en keuses, en klaarblyklik was dit nie vir my 'n prioriteit hierdie keer rond nie, want ek glo vas dat 'n mens volgens jou prioriteite lewe, wat vir jou belangrik is, of partymaal wat jy dink belangrik is.

Soveel mense lei 'n onvervulde lewe, met hul passies op die agtergrond geskuif deur omstandighede of omdat hulle doen wat hulle dink hulle móét doen om huis en haard bymekaar te hou. Ek weet party sal sê, "Ek sal graag 'n wildbewaarder wil wees, maar ek moet werk as 'n 'Boekhouer' want dis waarvoor ek gekwalifiseerd is en dit betaal die meeste", maar dis waar prioriteit inkom. Jy stel jou familie eerste, dus werk jy as 'n boekhouer. Dis jou prioriteit. En dis jou keuse.

Ons keuses is nie reg of verkeerd nie, dis net 'n keuse. Maar alle keuses lei tot 'n gevolg en dié gevolg bepaal hoe jy jou lewe lei. Ek weet nie of daar 'n volgende leeftyd is om weer te probeer nie, maar wat ek wél weet is dat, in die aangesig van die onsekerheid daarvan, maak dit sin om nou, in hierdie leeftyd, hierdie oomblik, jou lewe te lei vol passie en met oorgawe, en om dít te doen waarvoor jy lief is.

En onthou, "nothing is set in stone". Jy kan altyd jou keuse verander, veral as jy 'n vrou is!

Begeerte Maak die Ekonomie Groei

DIT IS INDIVIDUELE BEGEERTES WAT TOELAAT DAT DIE EKONOMIE GROEI — ons selfsugte natuur (wat 'n goeie ding is), die begeertes wat deur ons pols, is wat Bron-Energie byeen roep en dit is ook die kern van alle ekonomieë.

Die basis van elke ekonomie is individue met individuele begeertes. Maatskappye (strukture waardeur rykdom vloei) word dan geskep ten einde daardie begeertes te vervul. Met ander woorde, wanneer jy vra, word dit gegee... Maar as diegene in beheer van hierdie maatskappye nie vlytig is met die profyte nie, sal daar nie 'n voortsetting wees van die vervulling van die begeertes van die individue nie.

Derhalwe, om 'n organisasie te veroordeel vir sy vlytige optrede en winsgewing, veroorsaak dat jy nie in lyn is met die welsyn wat na jou sou gevloei het deur hulle nie.

Verander jou lewe vir ewig

'n Klompie jare terug was my lewe, om die minste te sê, uiters vaal, onbenullig, ongelukkig en rigtingloos. Ek het almal en alles geblameer vir my ongelukkigheid en nie gesien dat die antwoord reg onder my neus lê nie.

Ek het op 'n artikel afgekom omtrent "Living with Passion", en hierdie woorde, "Living with Passion is about creating and experiencing joy in as many aspects of life as possible" het my na my eie lewe met nuwe oë laat kyk. Wat op aarde het my laat dink dat enige iemand anders behalwe ek self verantwoordelik kan wees vir my geluk? 

'n Passievolle lewe is meer as net 'n filosofie—meer as onbenullige wense vir geluk in jou gedagtes. Dis nie 'n probleem-vry-, feëverhaal-bestaan nie en dit belowe ook nie rykdom en faam nie. Eerder, dis 'n bestaan wat bewustelik gekies is, bewustelik ontwerp is en 'n bestaan wat verantwoordelik gelewe word. Dit is 'n besluit omtrent wat jy wil vermag. Dit is om sonder huiwering deur elke storm van die lewe te beweeg en om wyser en sterker anderkant uit te kom. Dit is om aanhoudend te leer, lief te hê en te groei.

'n Passievolle lewe is 'n vervulde lewe. Dit laat jou toe om te sê, "Hierdie is belangrik. Dit is wat die Heelal my gegee het om na die wêreld te bring en ek gaan dit volstoom doen!"

'n Passievolle lewe bedoel jy neem verantwoordelikheid vir jou keuses, jou aksies en jou ondervindings. Dit bedoel jy beweeg vorentoe van hierdie dag sonder self-opgelegde limitasies, klagtes of spyt. 

Om passievol te lewe is om entoesiasties te lewe. Kombineer aksie en passie en jy sal entoesiasme beleef. En dit is maklik om entoesiasme met andere te deel want entoesiasme is aansteeklik. 

Vind jou passie vandag en deel vandag jou entoesiasme vir die lewe met iemand — 'n vriend, 'n medewerker, familielid of selfs iemand wat jy nog nooit tevore ontmoet het nie. 

'n Passievolle lewe is 'n inspirerende geskenk wat die wêreld vir baie generasies kan verhelder!

.